Karateçilərimiz MDB Oyunlarına hazırlığı davam etdirirlər

17–19 oktyabr 2025-ci il tarixlərində Fransanın paytaxtı Paris şəhərində keçirilmiş karate üzrə dünya çempionatına seçim mərhələlərində Azərbaycanı uğurla təmsil edən AHİİTA-nın perspektivli idmançısı Mədinə Sadıqova (-55 kq çəki dərəcəsi) yüksək nəticə göstərərək Dünya Çempionatına lisenziya qazanıb!

Mədinə Sadıqovanın bu uğuru, ölkəmizin karate sahəsində davamlı inkişafının və gənc idmançılarımızın beynəlxalq arenada güclü rəqabətə hazır olduğunun göstəricisidir.

Qeyd edək ki, Karate üzrə Dünya Çempionatı 27–30 noyabr tarixlərində Misirin paytaxtı Qahirə şəhərində keçiriləcək. Yarışda dünyanın müxtəlif ölkələrindən ən güclü karateçilər iştirak edəcək və Azərbaycan bu nüfuzlu idman tədbirində layiqincə təmsil olunacaq.

Gənc idmançımız Mədinə Sadıqovanı və onun şəxsi-məşqçi müəllimi, Əməkdar məşqçi Seymur Xudaverdiyevi bu əlamətdar nailiyyət münasibətilə təbrik edir, qarşıdan gələn dünya çempionatında uğurlar arzulayırıq!

III MDB Oyunları çərçivəsində karate üzrə yarışlarda Azərbaycan Həmkarlar İttifaqları İdman Təşkilatları Assosiasiyasının (AHİİTA) idmançıları yüksək nəticələr göstərərək medallar qazanıblar.

Yarışlarda Asiman Qurbanlı +84 kq çəki dərəcəsində gümüş medal, Rəşid Süleymanov isə 75 kq çəki dərəcəsində bürünc medal əldə edib.

Bu uğurlar idmançılarımızın beynəlxalq arenada güclü rəqiblər qarşısında yüksək peşəkarlıq və dözümlülük nümayiş etdirməsinin nəticəsidir. Nailiyyətlərin qazanılmasında şəxsi məşqçi-müəllim, Əməkdar Məşqçi Seymur Xudaverdiyev və Azərbaycan karate yığmasının böyük məşqçisi, Əməkdar Məşqçi Rəşad Hüseynovun da əməyi xüsusi qeyd olunmalıdır.

Qazanılan bu nəticələr Azərbaycan karate idmanının inkişaf səviyyəsini və idmançılarımızın beynəlxalq yarışlara hazırlıq səviyyəsini bir daha ortaya qoyur.

MDB Oyunlarında karate üzrə keçirilən yarışlarda Azərbaycanı təmsil edən Azərbaycan Həmkarlar İttifaqları İdman Təşkilatları Assosiasiyasının (AHİİTA) idmançıları ölkəmizi növbəti dəfə qürurlandırıblar. Gənc karateçilərimiz yüksək peşəkarlıq və əzmkarlıq nümayiş etdirərək iki qızıl medal qazanıblar!

Qeyd edək ki, bu uğura Mədinə Sadıqova 55 kq çəki dərəcəsində, Nuran Rzazadə isə 67 kq çəki dərəcəsində birinci yerə çıxmaqla imza atıblar.

Bu qələbələrin qazanılmasında idmançılarımızın şəxsi məşqçi-müəllimi, Əməkdar Məşqçi Seymur Xudaverdiyev və böyüklərdən ibarət Azərbaycan karate yığmasının böyük məşqçisi, Əməkdar Məşqçi Rəşad Hüseynovun da əvəzsiz rolu olub.

Bu nailiyyət yalnız AHİİTA-nın və məşqçi heyətinin peşəkar fəaliyyətinin nəticəsi deyil, eyni zamanda Azərbaycan karate idmanının beynəlxalq arenada nüfuzunun artmasının bariz göstəricisidir. Gənclərimizin uğurları ölkəmizin idman sahəsindəki inkişafına güclü təkan verir.

Türkiyədə keçirilən “Marmara Cup” beynəlxalq turnirində Azərbaycan Həmkarlar İttifaqları İdman Təşkilatları Assosiasiyasının (AHİİTA) karateçiləri uğurlu nəticələrə imza atıblar.

Turnirdə fərqlənən idmançılarımız:

• Nuran Rzazadə (-67 kq) – qızıl medal

• Mədinə Sadıqova (-55 kq) – gümüş medal

• Fatimə Cəbrayılova (-50 kq) – bürünc medal

Onların beynəlxalq arenada qazandıqları bu nailiyyətlərdə şəxsi məşqçiləri, Əməkdar məşqçi Seymur Xudavediyevin əməyi xüsusi qeyd olunmalıdır.

Qeyd edək ki, yarışda 28 ölkədən 2000-ə yaxın karateçi mübarizə aparıb. AHİİTA idmançılarının göstərdiyi nəticələr həm milli komandanın ümumi uğuruna töhfə vermiş, həm də qarşıdan gələn MDB oyunlarına hazırlıq baxımından mühüm əhəmiyyət kəsb etmişdir.

AHİİTA olaraq idmançılarımızı və onların uğurlarında böyük payı olan məşqçilərimizi səmimi qəlbdən təbrik edir, gələcək yarışlarda da yeni nailiyyətlər arzulayırıq!

11–13 iyul 2025-ci il tarixlərində Qazaxıstanın Astana şəhərində keçirilən “Qazaxıstan Open” beynəlxalq karate turnirində Azərbaycan Həmkarlar İttifaqları İdman Təşkilatları Assosiasiyasının (AHİİTA) karateçisi Mədinə Sadıqova uğurlu çıxış edərək 3-cü yerin sahibi olub.

Turnirdə güclü rəqiblərlə mübarizə aparan Mədinə Sadıqova, öz çəkisində göstərdiyi peşəkarlıq və əzmkarlıq sayəsində fəxri kürsüdə yer almağa nail olub.

2025-ci ilin iyun ayında Moldovanın paytaxtı Kişinyovda keçirilən “Chisinau Karate Open Grand Prix” beynəlxalq turnirində Azərbaycan Həmkarlar İttifaqları İdman Təşkilatları Assosiasiyasının (AHİİTA) idmançıları uğurlu nəticələr əldə ediblər.

U-14 yaş kateqoriyasında 54 kq çəki dərəcəsində yarışan Nigar Xanvəliyeva bütün rəqiblərinə qalib gələrək qızıl medala sahib olub. Böyüklər arasında 50 kq çəkidə çıxış edən Fatimə Cəbrayılova isə gümüş medal qazanıb.

Vətən Müharibəsi şəhidləri Səfərov Cəsarət və Səfərov Şahmarın əziz xatirəsinə həsr olunmuş karate üzrə reytinq turniri 21–22 may tarixlərində Fövqəladə Hallar Nazirliyinin İdman-Sağlamlıq Mərkəzində Azərbaycan Karate Federasiyasının rəhbərliyi və təşkilatçılığı ilə keçirilib.

AHİİTA-nın karateçiləri yarışda yüksək nəticələr əldə ediblər:

• Fatimə Cəbrayılova – 50 kq, I yer

• Mədinə Sadıqova – 55 kq, I yer

• Nuray Bayramlı – 55 kq, III yer

• Günay Ramazanova – 61 kq, III yer

16–18 may 2025-ci il tarixində Rumıniyanın Targu Mureș şəhərində keçirilən 15-ci Böyüklər arasında Şotokan Karate üzrə Avropa səviyyəli turnirdə Azərbaycan Həmkarlar İttifaqları İdman Təşkilatları Assosiasiyasının (AHİİTA) təmsilçisi Cəbrayılova Fatimə (50 kq) bütün rəqiblərinə qalib gələrək qızıl medal sahib olub!