“İgidlərin izi ilə” – Zəfərimizin 5 illiyinə həsr olunmuş möhtəşəm turnir Şuşada keçirildi

Azərbaycan Respublikasının Gənclər və İdman Nazirliyinin təşkilatçılığı ilə Mingəçevir şəhərində baş tutan “Kürü Keçək?!” açıq suda üzmə yarışında Azərbaycan Həmkarlar İttifaqları İdman Təşkilatları Assosiasiyasının (AHİİTA) İdman işinin təşkili və təlim şöbəsinin aparıcı mütəxəssisi Niyazi Məmmədov iştirak edib.

Bu yarış ölkəmizdə üzgüçülüyün inkişafına, sağlam həyat tərzinin təşviqinə və gənclərin idmana marağının artırılmasına yönəlib. AHİİTA nümayəndələrinin belə tədbirlərdə iştirakı həm idman hərəkatına dəstək baxımından, həm də təcrübə və əməkdaşlığın gücləndirilməsi üçün mühüm əhəmiyyət daşıyır.

28 avqust 2025-ci il tarixində Azərbaycan Həmkarlar İttifaqları İdman Təşkilatları Assosiasiyasının (AHİİTA) alpinizm üzrə məşqçi-müəllimi Sırxan Məmmədovun rəhbərliyi ilə təşkil olunan ekspedisiya çərçivəsində alpinistlərimiz Gürcüstanda yerləşən Kazbek dağına (5054 m) uğurlu yürüş həyata keçiriblər.

Ekspedisiya heyəti 6 nəfər azərbaycanlı alpinistdən və Türkiyədən qatılan əlavə 3 nəfərlik qrupdan ibarət olub.

Sərt külək, soyuq və ağır hava şəraitinə baxmayaraq, uzun və çətin marşrutu qət edən iştirakçılar dağı fəth etməklə öz dözüm və iradələrini bir daha sübut ediblər. Bu alpinist yürüşü yalnız idman uğuru deyil, həm də beynəlxalq dostluq və həmrəyliyin təcəssümü oldu.

AHİİTA adından ekspedisiya heyətinə, xüsusilə Türkiyədən qatılan dostlara təşəkkür edirik. Onların iştirakı səfəri daha da mənalı və yaddaqalan etdi.

26 iyul 2025-ci il tarixində Rusiyanın Nizhniy Novgorod şəhərində keçirilən beynəlxalq X-WATERS Volga açıq su üzgüçülük festivalında Azərbaycanı AHİİTA-nın Alpinizm Komandasının üzvü Elnur Məmmədov uğurla təmsil edib.

Tədbir çərçivəsində Elnur Məmmədov Volqa çayının güclü axını və dəyişkən hava şəraiti fonunda təşkil olunan 5.5 kilometrlik məsafəni uğurla qət edərək həm fiziki gücünü, həm də yüksək dözümlülüyünü nümayiş etdirib.

Qeyd edək ki, Elnur Məmmədov daha öncə də açıq su üzgüçülüyü sahəsində bir sıra beynəlxalq uğurlara imza atıb. O, Türkiyədə keçirilən və dünyanın ən nüfuzlu açıq su yarışlarından sayılan Bosphorus (Boğaziçi) və Dardanell (Hellespont) boğazı üzgüçülük marafonlarını da uğurla başa vurub.

Bu nəticə həm Elnur Məmmədovun fərdi nailiyyəti, həm də ölkəmizin idman sahəsində beynəlxalq arenada tanınmasının bariz nümunəsidir. AHİİTA olaraq, komandamızın üzvünü bu uğur münasibətilə təbrik edir, gələcək idman fəaliyyətlərində ona yeni-yeni zirvələr arzulayırıq.

19 iyul 2025-ci il tarixində “Qəbələ – İdman Paytaxtı 2025” layihəsi çərçivəsində Azərbaycan Alpinizm Federasiyasının təşkilatçılığı ilə Qəbələ rayonunun Vəndam kəndində yerləşən Qazan şəlaləsinə hiking (piyada yürüş) həyata keçirilib.

Tədbirin əsas məqsədi sağlam həyat tərzini təşviq etmək, ekoloji şüuru artırmaq və regionun təbii gözəlliklərini tanıtmaq olub. Vəndam kəndindən başlayan marşrut meşəlik və dağlıq əraziləri əhatə edərək təxminən 6 kilometr məsafəni qət edib. Çətinliyi orta səviyyədə qiymətləndirilən yürüş zamanı təhlükəsizlik qaydalarına tam riayət olunub.

Azərbaycan Həmkarlar İttifaqları İdman Təşkilatları Assosiasiyasının (AHİİTA) alpinizm üzrə məşqçi-müəllimləri Faiq Mursaqulov və Etibar Məmmədov, eləcə də AHİİTA-nın üzvləri yürüşdə fəal iştirak edərək öz peşəkarlıqlarını nümayiş etdiriblər.

Qeyd edək ki, çətin relyefə malik bu marşrutu ilk dəfə uğurla keçən qrup məhz AHİİTA komandası olub! Yürüş boyunca iştirakçılar təbiətə hörmətli yanaşma və ekoloji davranış qaydaları barədə məlumatlandırılıb. Təcrübəli bələdçilərin müşayiəti ilə həyata keçirilən bu layihə regionun idman və ekoturizm potensialının inkişafına dəyərli töhfədir.

Azərbaycan Həmkarlar İttifaqları İdman Təşkilatları Assosiasiyasının (AHİİTA) alpinizm üzrə məşqçi-müəllimi Sırxan Məmmədovun rəhbərliyi ilə həyata keçirilən #PamirExpedition2025 layihəsi uğurla davam edir.

Bu möhtəşəm ekspedisiyanın məqsədi Qırğızıstanın Pamir dağ silsiləsində yerləşən Lenin zirvəsi (7134 m)-ni fəth etməkdir. Ekspedisiya çərçivəsində akklimatizasiya proqramının ilk iki mərhələsi müvəffəqiyyətlə başa çatıb:

🔺 1-ci mərhələdə iştirakçılar 4000 metrdən yüksək iki ayrı zirvəyə texniki çıxış edərək bədənin yüksəkliyə uyğunlaşmasını təmin ediblər.
🔺 2-ci mərhələdə isə 4400 metrdə yerləşən 1-ci düşərgəyə yürüş baş tutub və Yuxin zirvəsinə (5130 m) uğurlu akklimatizasiya çıxışı həyata keçirilib.

Bu akklimatizasiya mərhələləri ekspedisiyanın təhlükəsiz və planlı şəkildə davam etməsi üçün əsas rol oynayır. Bədənin yüksəkliyə uyğunlaşması və fiziki hazırlıq zirvəyə doğru təhlükəsiz yüksəlişin zəmanətidir.

Ekspedisiya peşəkar yanaşma və yüksək səviyyəli hazırlıqla planlaşdırıldığı kimi davam edir. Zirvəyə aparan yol asan olmasa da, Sırxan Məmmədov və onun komandası qətiyyət, iradə və təcrübə ilə qarşıdakı çətinliklərin öhdəsindən gəlməyə hazırdır.

💪 Bütün iştirakçılara və Sırxan müəllimə uğurlar arzulayırıq! Azərbaycanın bayrağını 7134 metr yüksəklikdə dalğalandırmaq üçün addımlar atılır!

09–10 iyul tarixlərində Azərbaycan Həmkarlar İttifaqları İdman Təşkilatları Assosiasiyasının (AHİİTA) alpinizm üzrə məşqçi-müəllimi Şirxan Məmmədovun rəhbərliyi ilə 4 nəfərlik qrup ölkəmizin ən yüksək nöqtəsi — 4 466 metr hündürlüyə malik Bazardüzü zirvəsinə uğurlu yürüş həyata keçirib.

Çətin və dumanlı hava şəraitinə baxmayaraq, yürüş təhlükəsizlik qaydalarına tam əməl olunaraq başa çatıb və iştirakçıların hər biri zirvəyə qalxmağa nail olub.

Növbəti hədəf daha da yüksəkdir. 12 iyul tarixində Şirxan Məmmədov Qırğızıstanın Pamir dağ silsiləsində yerləşən 7 134 metr hündürlüyündəki Lenin zirvəsinə yürüş üçün yola düşür.

2025-ci il 8 iyun tarixində Azərbaycan Alpinizm Federasiyasının təşkilatçılığı, Dövlət Turizm Agentliyi və Ekologiya və Təbii Sərvətlər Nazirliyinin dəstəyi ilə Altıağac Milli Təbiət Qoruğunda möhtəşəm piyada yürüş (hiking) keçirilib.

Tədbirdə 50 nəfər iştirakçı 12 kilometrlik marşrut üzrə füsunkar təbiəti kəşf edib, həm istirahət edib, həm də sağlam həyat tərzinə töhfə verib. Gözəl hava şəraiti və tətil gününün ruhu iştirakçıların yolunu daha da mənalı edib.

Azərbaycan Həmkarlar İttifaqları İdman Təşkilatları Assosiasiyasının (AHİİTA) alpinistləri də bu yürüşdə fəal iştirak edərək, təbiətə bağlılıqlarını və fiziki aktivliyə verdikləri önəmi bir daha nümayiş etdiriblər.

Tədbir öncəsi iştirakçılara təhlükəsizlik və dağlıq ərazilərdə davranış qaydaları barədə məlumat verilib. Maarifləndirici və ruhlandırıcı bu gün hər bir iştirakçının yaddaşında xoş xatirə kimi qalacaq.

Azərbaycan Alpinizm Federasiyası yürüşün sonunda təşəkkürünü bildirərək, növbəti bayram və həftəsonlarında bu cür ekoloji tədbirlərin davam edəcəyini qeyd edib.

AHİİTA olaraq biz də bütün təbiətsevərləri dağlara doğru sağlam addımlar atmağa və ekoloji dəyərləri paylaşmağa çağırırıq!

Azərbaycan Həmkarlar İttifaqları İdman Təşkilatları Assosiasiyasının bir qrup alpinisti Ümummilli Lider Heydər Əliyevin anadan olmasının 102-ci ildönümü münasibətilə Qusar rayonunun Qızılqaya dağ massivində, 3751 metr yüksəklikdə yerləşən “Heydər zirvəsi”nə yürüş ediblər.

Çətin hava şəraitinə və mürəkkəb relyefə baxmayaraq, həmkarlarımız böyük əzmkarlıq və iradə nümayiş etdirərək zirvəyə qalxmağı bacarıblar.

Bu yürüş Ulu Öndərin əziz xatirəsinə dərin hörmətin və gənclərə örnək olan mübarizə ruhunun ifadəsidir!